ದಿವಂಗತ ಪವರ್ ಸ್ಟಾರ್ ಪುನೀತ್ ರಾಜ್ಕುಮಾರ್ ಅವರು ಬದುಕಿದ್ದಾಗ ತಮ್ಮ ಕುಟುಂಬದ ಬಗ್ಗೆ ಅಪಾರ ಪ್ರೀತಿ ಮತ್ತು ಭವಿಷ್ಯದ ಕನಸುಗಳನ್ನು ಹೊಂದಿದ್ದರು. ತಮ್ಮ ಮಕ್ಕಳ ಪ್ರತಿಭೆಯನ್ನು ಗುರುತಿಸಿ, ಅವರನ್ನು ಸ್ವಾವಲಂಬಿಗಳನ್ನಾಗಿ ಮಾಡಬೇಕೆಂಬುದು ಅವರ ಹಂಬಲವಾಗಿತ್ತು. ಇದೀಗ ಪುನೀತ್ ಅವರ ಎರಡನೇ ಪುತ್ರಿ ವಂದಿತಾ ಪುನೀತ್ ರಾಜ್ಕುಮಾರ್, ಅಪ್ಪನ ಅದೇ ಇಚ್ಛೆಯನ್ನು ನನಸಾಗಿಸುವ ನಿಟ್ಟಿನಲ್ಲಿ ಹೆಜ್ಜೆ ಇಟ್ಟಿದ್ದಾರೆ. ತಮ್ಮ ಬೇಕಿಂಗ್ ಹವ್ಯಾಸವನ್ನೇ ಇದೀಗ ಒಂದು ಸುಂದರ ಉದ್ಯಮವಾಗಿ ಪರಿವರ್ತಿಸಿಕೊಂಡಿದ್ದಾರೆ.
ಅಪ್ಪನ ಕನಸಿಗೆ ಸಿಕ್ಕ ಸಾಕಾರ
ವಂದಿತಾ ಪುನೀತ್ ರಾಜ್ಕುಮಾರ್ ಅವರು 'ನುಕಾ’ಸ್ ಕೆಫೆ' (Nuka's Cafe) ಎಂಬ ಹೋಮ್ ಬೇಕರಿಯನ್ನು ಆರಂಭಿಸಿದ್ದಾರೆ. ಇದು ಕೇವಲ ಒಂದು ಬಿಸಿನೆಸ್ ಮಾತ್ರವಲ್ಲ, ಪುನೀತ್ ರಾಜ್ಕುಮಾರ್ ಅವರು ಕಂಡಿದ್ದ ಒಂದು ಕನಸಿನ ಸಾಕಾರವೂ ಹೌದು. ಈ ಬಗ್ಗೆ ಗೀತಾ ಶಿವರಾಜ್ ಕುಮಾರ್ ಅವರು 'ಶಕ್ತಿ' ಸಂವಾದ ಕಾರ್ಯಕ್ರಮದಲ್ಲಿ ಮನಬಿಚ್ಚಿ ಮಾತನಾಡಿದ್ದರು.
"ಅಪ್ಪು ಯಾವಾಗಲೂ ವಂದಿತಾಗೆ, ನೀನು ಬೇಕಿಂಗ್ ಚೆನ್ನಾಗಿ ಮಾಡ್ತೀಯಾ, ಯಾಕೆ ಇದನ್ನ ಕಮರ್ಶಿಯಲ್ ಆಗಿ ಮಾಡಬಾರದು ಎಂದು ಕೇಳುತ್ತಿದ್ದರು. ನುಕ್ಕಿ (ವಂದಿತಾ ಅವರ ನಿಕ್ ನೇಮ್) ಮತ್ತು ಬೇಕಿಂಗ್ ವಿಷಯದಲ್ಲಿ ಅಪ್ಪುಗೆ ಅತೀವ ಆಸಕ್ತಿಯಿತ್ತು. ನೀವಿಬ್ಬರೂ ಸೇರಿ ಏನಾದರೂ ಮಾಡಿ ಎಂದು ಅಪ್ಪು ಸಲಹೆ ನೀಡುತ್ತಿದ್ದರು" ಎಂದು ಗೀತಾ ಶಿವರಾಜ್ ಕುಮಾರ್ ನೆನಪಿಸಿಕೊಂಡಿದ್ದರು. ಇದೀಗ ಆ ಮಾತುಗಳನ್ನು ಅಕ್ಷರಶಃ ಪಾಲಿಸಿರುವ ವಂದಿತಾ, ತಮ್ಮ ನಿಕ್ ನೇಮ್ ಅನ್ನೇ ಉದ್ಯಮದ ಹೆಸರನ್ನಾಗಿ ಮಾಡಿಕೊಂಡಿದ್ದಾರೆ.
ಏನಿದು ‘ನುಕಾ’ಸ್ ಕೆಫೆ’?
ವಂದಿತಾ ಅವರು ಬೆಂಗಳೂರಿನಲ್ಲಿ ದೊಡ್ಡದಾದ ಬೇಕರಿ ಮಳಿಗೆಯನ್ನು ತೆರೆದಿಲ್ಲ. ಬದಲಾಗಿ, ಇದು ಸಂಪೂರ್ಣವಾಗಿ ಆನ್ಲೈನ್ ಮೂಲಕ ನಡೆಯುವ 'ಹೋಮ್ ಬೇಕರಿ' ವ್ಯವಹಾರವಾಗಿದೆ. ನುಕಾ’ಸ್ ಕೆಫೆ ಹೆಸರಿನಲ್ಲಿ ವೆಬ್ಸೈಟ್ ತೆರೆದಿರುವ ಅವರು, ಅಲ್ಲಿಂದಲೇ ಆರ್ಡರ್ಗಳನ್ನು ಸ್ವೀಕರಿಸುತ್ತಾರೆ.
ಈ ಉದ್ಯಮದ ವಿಶೇಷತೆಯೆಂದರೆ, ವಂದಿತಾ ಅವರು ಸ್ವತಃ ತಾವೇ ತಮ್ಮ ಕೈಯ್ಯಾರೆ ತಿನಿಸುಗಳನ್ನು ತಯಾರಿಸುತ್ತಾರೆ. ಯಂತ್ರಗಳಿಗಿಂತ ಹೆಚ್ಚಾಗಿ ತಮ್ಮ ಪ್ರೀತಿ ಮತ್ತು ಕೌಶಲ್ಯವನ್ನು ಬೆರೆಸಿ ತಯಾರಿಸುವ ಈ ತಿನಿಸುಗಳಿಗೆ ಇದೀಗ ಬೇಡಿಕೆ ಹೆಚ್ಚಾಗುತ್ತಿದೆ. ಆರ್ಡರ್ ಬಂದ ತಕ್ಷಣ, ಯಾವುದೇ ಸ್ಟಾಕ್ ಇಟ್ಟುಕೊಳ್ಳದೆ ತಾಜಾ (Fresh) ಆಗಿ ತಯಾರಿಸಿಕೊಡುವುದು ಇವರ ಮೂಲ ಮಂತ್ರ.
ಕಾರ್ಯನಿರ್ವಹಣೆ ಮತ್ತು ಗುಣಮಟ್ಟ
ವಂದಿತಾ ಅವರು ತಮ್ಮ ಬೇಕರಿ ತಿನಿಸುಗಳ ಬಗ್ಗೆ ವೆಬ್ಸೈಟ್ನಲ್ಲಿ ಸ್ಪಷ್ಟವಾದ ಮಾಹಿತಿಯನ್ನು ನೀಡಿದ್ದಾರೆ:
- ತ್ವರಿತ ಸೇವೆ: ವೆಬ್ಸೈಟ್ ಮೂಲಕ ಆರ್ಡರ್ ಬಂದ 1-2 ದಿನಗಳಲ್ಲಿ ತಿನಿಸುಗಳನ್ನು ತಯಾರಿಸಿ ತಲುಪಿಸಲಾಗುತ್ತದೆ.
- ಕಸ್ಟಮೈಸ್ಡ್ ಸೇವೆ: ಹುಟ್ಟುಹಬ್ಬ, ವಿಶೇಷ ಈವೆಂಟ್ಗಳಿಗೆ ಬೇಕಾದ ಕೇಕ್, ಕುಕ್ಕೀಸ್ ಮತ್ತು ಇತರ ತಿನಿಸುಗಳನ್ನು ಥೀಮ್ಗೆ ತಕ್ಕಂತೆ ತಯಾರಿಸಿಕೊಡುತ್ತಾರೆ. ಇಂತಹ ಕಸ್ಟಮೈಸ್ಡ್ ಆರ್ಡರ್ಗಳಿಗೆ 5-10 ದಿನಗಳ ಕಾಲಾವಕಾಶದ ಅಗತ್ಯವಿರುತ್ತದೆ.
- ವೈಯಕ್ತಿಕ ಸ್ಪರ್ಶ: ವಂದಿತಾ ಅವರೇ ಖುದ್ದಾಗಿ ಎಲ್ಲವನ್ನೂ ತಯಾರಿಸುವುದರಿಂದ, ಕೆಲವೊಮ್ಮೆ ಆರ್ಡರ್ಸ್ ಜಾಸ್ತಿ ಬಂದಾಗ ವಿತರಣೆಯಲ್ಲಿ ಸ್ವಲ್ಪ ತಡವಾಗಬಹುದು ಎಂಬ ಪ್ರಾಮಾಣಿಕ ಮಾಹಿತಿಯನ್ನು ಅವರು ಗ್ರಾಹಕರಿಗೆ ನೀಡಿದ್ದಾರೆ.
ಹವ್ಯಾಸದಿಂದ ವೃತ್ತಿಯ ಕಡೆಗೆ...
ಬೇಕಿಂಗ್ ಎನ್ನುವುದು ವಂದಿತಾ ಅವರಿಗೆ ಮೊದಲಿನಿಂದಲೂ ಇದ್ದ ಒಂದು ಹವ್ಯಾಸ. ಇದೀಗ ಅದನ್ನೇ ವೃತ್ತಿಯನ್ನಾಗಿ ಮಾಡಿಕೊಂಡಿರುವ ಅವರು, ಪುನೀತ್ ರಾಜ್ಕುಮಾರ್ ಅವರ ಶ್ರಮಜೀವಿ ಗುಣವನ್ನು ಮೈಗೂಡಿಸಿಕೊಂಡಿದ್ದಾರೆ. ಇತ್ತ ಗೀತಾ ಶಿವರಾಜ್ ಕುಮಾರ್ ಅವರು 'ಶಕ್ತಿಧಾಮ'ದ ಹೆಣ್ಮಕ್ಕಳಿಗೆ ಬೇಕಿಂಗ್ ತರಬೇತಿ ನೀಡುವ ಮೂಲಕ ಅವರನ್ನು ಸ್ವಾವಲಂಬಿಗಳನ್ನಾಗಿ ಮಾಡುತ್ತಿದ್ದಾರೆ. ಅತ್ತ ಪುನೀತ್ ಅವರ ಮಗಳು ವಂದಿತಾ, ಸ್ವತಃ ಅಪ್ಪನ ಕನಸಿನಂತೆ ಉದ್ಯಮಶೀಲತೆಯ ಪಥದಲ್ಲಿ ಸಾಗುತ್ತಿದ್ದಾರೆ.
ಪುನೀತ್ ರಾಜ್ಕುಮಾರ್ ಅವರ ಅಕಾಲಿಕ ನಿಧನದ ನಂತರ ಇಡೀ ಕುಟುಂಬ ಧೃತಿಗೆಡದೆ, ಅವರ ಆದರ್ಶಗಳನ್ನು ಪಾಲಿಸುತ್ತಾ ಸಾಗುತ್ತಿರುವುದು ಅಭಿಮಾನಿಗಳಿಗೆ ಹೆಮ್ಮೆಯ ವಿಷಯವಾಗಿದೆ. ವಂದಿತಾ ಅವರ ಈ ನುಕಾ’ಸ್ ಕೆಫೆ ಉದ್ಯಮವು ಭವಿಷ್ಯದಲ್ಲಿ ದೊಡ್ಡ ಮಟ್ಟಕ್ಕೆ ಬೆಳೆಯಲಿ ಮತ್ತು ಅವರ ಅಪ್ಪನ ಆಶೀರ್ವಾದ ಸದಾ ಅವರ ಮೇಲೆ ಇರಲಿ ಎಂದು ಅಭಿಮಾನಿಗಳು ಹಾರೈಸುತ್ತಿದ್ದಾರೆ.
Comments
Please to leave a comment on this article.